Signerte damespelarar 2015/16
Under finn du oversikt over signeringane på damesida før sesongen 2015/16. Trenarduoen Kasia Ciesielska og Torbjørn Thue er i gang med sikre seg ein ung, men hardtkjempande stall før eliteserien går i gang seinare i haust.
Vil du ha nyheitene enno raskare, anbefalar vi deg å følgje oss på Facebook.
signerte spelarar hittil
7.september 2015
Linnea Skrede Hervik
Då kan vi presentere Linnea Skrede Hervik som Førde-spelar neste sesong. Linnea er den tredje spelaren på laget vi presenterer fødd i 99, ein god årgang for klubben.
Linnea er ei blid Førde-jente, har gått gradene i klubben, og starta i år på Hafstad VGS, der ho har blitt tatt opp på volleyballsatsinga. 16-åringen blei tatt opp i elitetroppen sist sesong, og hadde nokre solide innhopp på laget i løpet av vinteren/våren. Linnea har det siste året henta heim 3 NM-medaljar, gull i region-NM, bronse i NM U19, og no i august var ho med på bronse-laget i NM region beach. Linnea hadde æra av å dunke inn match-ballen då vi tok gullet i Oslo, ein ball som bakrekka frå Nord enno har øyresus etter.
Linnea har sin styrker både i angrep og forsvar, er ein spelar for framtida, og det skal bli spennande å følge hennas vidare utvikling i klubben. Linnea kan for det utrente øyet virke litt beskjeden, men det er før ein ser ho i aksjon på volleyballbana.
1.september 2015
Andrea Kvamme Berge
Då har vi gleda av å presentere Andrea Kvamme Berge som Førde-spelar også neste sesong. Andrea er foreløpig siste i ei lang rekke Berge-leggarar i klubben. Ho går no inn i sin fjerde sesong for elitelaget, imponerande med tanke på at Andrea berre er 18 år!
Andrea har no byrja på 3.året på Hafstad VGS og har fulgt volleyballsatsinga der like lenge. Etter at Kasia måtte kaste inn handkleet på grunn av ryggproblem i fjor rykka Andrea opp som førsteleggar på laget, ei oppgåve ho løyste på ein framifrå måte.
Andrea har fleire turar med alderbestemte landslag (U17 og U19) til mellom anna Sverige og England og har spelt 6 kampar med flagget på brystet. Vidare var Andrea oppleggar på laget til Hafstad som tok sølv i NM VGS, og Førde-jentene sin bronse i NM U19 i fjor.
Andrea er ein meget god og inkluderande lagspelar, og med hennas fantastiske touch på ballen blir ho ein viktig spelar for oss komande sesong. Biletet viser Andrea i kjent positur, og ein (utan grunn) litt småbekymra Tvinde i bakgrunnen.
26.august 2015
Nora Karoline Berge
Nora Karoline Berge har skrive kontrakt for Førde VBK. Nora flytta frå Førde etter VGS for å studere fysioterapi i Oslo og Nederland, men til tross for studiar har har ho holdt volleyballferdigheitane godt ved like med spel for både Koll i Oslo og klubben Harambee i Enschede, Nederland.
Nora har spelt volleyball for FVBK i ca 10 år før ho reiste frå bygda, og frå dei åra har ho en fin liten samling av medaljer fra aldersbestemt NM. Nora var bl.a. med på Førde sitt elitelag då dei spelte cupfinale i 2012.
Nora er no komen heim til Førde for å gjennomføre sitt turnusår som fysioterapeut, og ynskjer å kombinere dette med volleyball. Ikkje heilt utenkeleg at Førde kan få god bruk for hennas volleyballferdigheter, så vel som litt bistand frå hennas terapeut-ferdigheter (alltid nokon som skal tapast).
Nora uttalar at ho i hovudsak har spelt oppleggar, men at ho i komande sesong ynskjer å prøve sine volleyballferdigheiter som libero. Vi gler oss over returen og ser fram til å sjå Nora i Førdehuset igjen!
20.august 2015
Elisabeth Viken
Nytt blad Viken på frammarsj. Elisabeth «mini-vikja» Viken har i dag signert for oss. Jenta frå Viksdalen blir med det ei av to jenter frå Gaular på laget. 99-modellen er nett i gang med volleysatsinga på Hafstad VGS, og har med det teke med seg volleyballane og flyttelasset hit til oss!
15-åringen sanka poeng jamt og trutt som midtspelar for eliteserielaget vårt sist sesong, og det er ingen grunn til å tru at det blir mindre i år. Det er med andre ord enkelt å sjå slektsforholdet til storesøster Martine. Elisabeth var også med på å hente heim to NM-medaljar i vinter; gull i regions-NM, der ho også havna på all star-teamet som beste midtspelar, og bronse i NM U19.
Ho er også aktiv i sanden og reiser land og strand rundt saman med Marte Gundersen, og fekk tidlegare i sommar ein flott 9.plass av 50 lag i U17 NM.
Blant Elisabeth sine styrkjer er spenst, hurtigheit og ikkje minst godt humør, og vi er svært glade for at ho er med oss vidare!
13.august 2015
Karoline Fauske
Ung, men svært viktig. Då kan vi presentere Karoline Fauske som Førde-spelar også neste sesong. Karoline tilhøyrer den gyldne 99-generasjonen i klubben, og var og er den yngste spelaren på laget.
Karoline startar i haust på Hafstad VGS, og er av innlysande grunnar også komen inn på elitesatsinga der. Karoline sanka 10 poeng i sin første eliteseriekamp for Førde i fjor, i ein alder av 14 år. 14! Ein alder sjølv Martin Ødegaard misunnar ho. Som 14-åring spelte ho også sine første landskampar for Noreg i NEVZA U17 i fjor haust, og har i løpet av 2015 tileigna seg 3 NM-medaljar. Gull og MVP i regions-NM, bronse i NM U19 og bronse i NM U17 i sandvolleyball med Elise Thue.
Karoline er litt som poteta, kan nyttast over alt. I fjor spelte ho både kant, dia og midt, men dersom ho får velje sjølv spelar ho nok helst på kantplass. Med sine 182cm på strømpelesten, og med si kraft og treningsiver, blir Karoline ein viktig spelar komande sesong.
10.august 2015
Karoline Nore
VIKTIG POENGSANKAR BLIR MED VIDARE
Trenarteamet på damesida har ikkje låge på latsida i helga og vi kan med dette presentere Karoline Nore som Førdespelar neste sesong. Karoline er 19 år og er akkurat ferdig med 3 år på Hafstad VGS og volleyballsatsinga der.
Den hardtslåande midtspelaren har spelt for Førde i fleire sesongar, og ynskjer å satse med laget eitt år til. Karo har reist fleire turar med aldersbestemte landslag til både Russland, Sverige og Italia, og har spelt 9 landskampar for Noreg. Vidare var Karo med på U19-laget som tok NM-bronse tidlegare i år, samt sølv i NM VGS. Karo og Julie Tvinde tok også ein flott 4.plass i NM U21 i sandvolleyball no nyleg. Ein imponerande CV vi ser fram til å dra nytte av og vere med å utvikle!
Karo var ein viktig poengsankar for oss førre sesong, er ei skikkeleg gladjente og ein spelar klubben er svært glad for å ha med vidare.
7.august 2015
Julie Tvinde
Julie Tvinde på plass. Julie Tvinde, 18 år og kantspelar, har signert ny kontrakt for Førde VBK. Julie er Førde-jente og har gått alle gradane i klubben. Ho skal frå hausten gå 3. klasse ved Hafstad VGS, og har fullført 2 år på elitesatsinga der. Dei siste åra har Julie styra fælt med eit kne, måtte operere, og fekk ein lang pause frå volleyball og ein lang periode med styrke/opptrening.
Ho har hatt fleire turar med aldersbestemte landslag, og har spelt 6 landskamper for Noreg. Julie var med på Førde-laget som tok bronse i NM U19 i år, ein meget god prestasjon med eit veldig ungt lag. Julie fikk også sølv med Hafstad i NM for videregåande skular i vinter.
Julie satsar også på sandvolleyball og har i sommar reist mykje rundt på turneringar i Noreg. Som vi ser på biletet likar ho å trene mest mogleg og med ekstrajobb på Puls blir det nok kraftfulle angrep frå kantplass komande sesong. Julie uttalar at ho ser fram til ein sesong der ho for ein gangs skyld er frisk i kneet og kan trene optimalt.
5.august 2015
Kasia Ciesielska
Kasia tek over som spelande trenar. Også på damefronten skjer det ting i Førde, og framover vil vi presentere stallen som skal kjempe i eliteserien komande sesong.
Først ut er Kasia Ciesielska, som har signert ny kontrakt med Førde VBK. Kasia er 28år og har spelt i blått i 3 år allereie, og har truleg vore beste oppleggar i eliteserien dei siste åra. Ho har tidlegare spelt polsk 1.divisjon, og det seier ein del om nivået hennar med tanke på kor stort volleyball er i Polen.
Kasia har vore gjennom ein ryggoperasjon i vår, men håpar å kome tilbake på bana i løpet av sesongen. I tillegg til spelarrolla har ho også fått jobben som hovudtrenar for damelaget etter Jan Egil Tvinde, samt at ho held fram som trenar/ansvarleg for elitesatsinga i volleyball på Hafstad VGS i Førde.
Her har ho allereie gjort seg bemerka med både gull (gutar) og sølv (jenter) i NM for vidaregåande skular tidlegare i år, i tillegg som lagleiar/trenar for regionslaget (U16) i Sogn og Fjordane som tok gull i årets NM. Ei stor bragd av både spelarar og av Kasia, og vi ser fram til ein ny, spanande sesong!