Fakta om Førde Volleyballklubb

Kort oppsummert…

• Førde Volleyballklubb er ein av dei beste volleyballklubbane i Noreg
• Dame- og herrelaget har fleire gongar vunne eliteserien og NM
• Førde Volleyballklubb har over 150 aktive spelarar i på ulike nivå
• Vi er stolte over å vere i toppen av norsk volleyball, samstundes som vi har god breiddesatsing

Kortversjonen av historia om Førde Volleyballklubb

Alt i 1969 vart det spelt volleyball i Førde. Då starta Herman Johansen opp med jente- og gutelag ved Førde Gymnas, og dei stilte med gymnaslag i seriesystemet. Seinare vart det aktuelt å skipe eigen volleyballklubb, og Førde Volleyballklubb såg dagens lys i 1974. Utover på 1970-talet var Inge Andersen ein sentral person i drifta av klubben. På denne tida dukka og kjende namn som Merita Hjelmeland og Vølstad-søskena opp. Fleire av dei var faste spelarar på landslaga.

Herrelaget tok første gong bronse i noregscupen i 1981. Magne Hornnes var trenar for laget frå midten av 1980-talet, og han fekk i 1993 starta volleyballskulen – eit samarbeidsprosjekt mellom dei vidaregåande skulane i Førde. I 1994 deltok eit lag frå Førde i skule-VM i Paris. Dei enda på 11. plass.

Sidan rykte Førde opp og ned fleire gongar, og det skikkelege gjennombrotet i norsk toppvolleyball kom først i 2007. Med Arild Undheim som trenar vann herrelaget for første gong cupfinalen og vart dermed noregsmeistrar. Etter dette har klubben vore blant dei aller fremste på herresida, og den første seriemeisterskapen sikra laget seg i 2008. Den same hausten debuterte Førde på lågaste nivå i europacupen. Den første kampen i Challenge cup enda med 0–3-tap heime mot MOK Zagreb frå Kroatia.

Herrelaget vart nordiske meistrar i 2011 og har seinare delteke fleire gongar i europacupen. Hausten 2018 deltok dei for første gong i CEV-cupen, på nivået under Champions League, der dei gjekk vidare til 16-delsfinalen etter to sterke kampar mot det ukrainske profflaget Novator Khmelnytskyi. I 16-delsfinalen vart TIF Viking frå Bergen for sterke, og Førde var ute av europacupen.

Damelaget gjekk for første gong til topps i NM i 2018. Seinare samme året vann dei også serien for første gong, og dei spelte i den europeiske CEV-cupen vinteren 2018–2019. Der tapte Førde mot franske Saint Raphaël i første runde.

I 2019 kom eit førebels høgdepunkt i klubben si historie, då Førde tok dobbelt NM-gull – med siger til både herre- og damelaget i cupfinalane. Same året vann herrelaget nok eit seriegull, og i 2021 tok Førde sitt herrelag sin sjette NM-tittel så langt.

Kjelder: Allkunne.no og Store norske leksikon

Premieskapet vårt

Oversikten syner titlar Førde Volleyballklubb har teke på seniornivå:

Seriegull for herrar: 2008, 2013, 2016, 2017 og 2019

NM-gull for herrar: 2007, 2011, 2016, 2019, 2020 og 2021

Seriegull for kvinner: 2018

NM-gull for kvinner: 2018 og 2019

Nordisk meister for herrar: 2011

Førde Volleyballklubb har sidan starten i 1974 teke meir 60 medaljar i NM for ungdom og junior.

Oppdatert per september 2021